नानी सेकाउन खोज्दा बाबुको मृत्यु, आमा बेहोस १८ पुस, काठमाडौं । राजधानीमा एकाएक चिसो बढेपछि ललितपुरको पाटनमा आफ्नो एक महिने शिशुलाई जाडोबाट जोगाउन कोइला बालेर सुतेका बाबुको कोठाभित्रै गुम्सिएर मृत्युभएको छ भने आमाको दुई दिनसम्म होस खुल्न सकेको छैन । कोइला बालेर कोठामा सुतेको अवस्थामा धनकुटा, खोकु घर भई पाटनमा डेरा गरी बस्ने अञ्दाजी २० वर्षका भीमबहादुर राईको आइतबार राति गुम्सिएर मृत्यु भएको हो । सोमबार बिहान अबेरसम्म राई दम्पत्तिको चालचुल नदेखेपछि छिमेकीहरुले ढोका फुटाएर हेर्दा भीमबहादुर मृत भेटिएका थिए भने श्रीमती बेहोस अवस्थामा थिइन् । शिशुलाई भने केही भएको थिएन । मृत राईको सोमबार पशुपतिमा दाहसंस्कार गरिएको छ । पाटन अस्पतालमा रहेकी उनकी पत्नीको मंगलबार बेलुकासम्म होस खुलेको छैन । पहिलो सन्तानका रुपमा जन्मिएको डेढ महिनाको छोराको अवस्था भने सामान्य रहेको धनकुटा घर भई ललितपुर बस्ने चेली राईले अनलाइनखबरलाई बताइन् । ‘बच्चालाई हामीले दूध खुवाइरहेका छौं, आमाको अझै होस खुलेको छैन । – उनले भनिन् ।

Posted in: